Shyǵys Qazaqstanda azyq-túlik baǵasyna baqylaý kúsheıtildi
Jyl basynan beri óńirde kókónistiń, kúnbaǵys maıynyń, qant pen sút ónimderiniń baǵasy birshama ósken. Sarapshylardyń aıtýynsha, bul ótken jylǵy egin ónimderiniń azaıýynan, kommýnaldyq qyzmetter tarıfteriniń qymbattaýynan jáne Reseı Federatsııasynan keletin qaptama materıaldar baǵasynyń joǵarylaýynan boldy.
1 shildeden bastap «Saýda qyzmetin retteý týraly» zańǵa jasalǵan túzetýler kúshine engen. Endi jergilikti atqarýshy organdar áleýmettik mańyzy bar azyq-túlikti satýshylardyń baǵany 15 paıyzdan asyrmaýyn qadaǵalaıtyn bolady. Osy erejeni buzǵandarǵa ákimshilik jaýapkershilik qarastyrylǵan.
Óskemen qalalyq máslıhatynyń hatshysy Aleksandr Svetashtyń aıtýynsha, shaharda áleýmettik mańyzy bar taýarlardyń baǵasyn turaqtandyrý boıynsha arnaıy monıtorıngtik toptar jumys isteıdi. Qazirgi ýaqytta olar kásip ókilderine zańnama normalaryn túsindirý maqsatynda saýda nysandaryn jıi aralaýda.
«Baǵany retteý úshin qaladaǵy kásipkerlermen 210 memorandým jasaldy. Sondaı-aq biz áleýmettik mańyzy bar azyq-túlik taýarlaryn satatyn 30 saýda ornyn iske qostyq. Jospar boıynsha 2021-2022 jyldary turaqtandyrý qoryna 2,9 myń tonna kartop, sábiz, pııaz, qyryqqabat jetkizilmek», - dedi Aleksandr Svetash.
Budan bólek, «Ertis» ÁKK-niń saýda pavılondarynda áleýmettik mańyzy bar taýarlardyń 8 túri 20 paıyzǵa deıingi tómen baǵada satylyp jatyr. Atap aıtqanda, birinshi sortty un - 155 teńge, qant - 290 teńge, kúrish - 231 teńge, qaraqumyq - 325 teńge, kúnbaǵys maıy - 600 teńge, tuz - 50 teńge, kespe - 200 teńge, jumyrtqa - 300 teńge.