Shyǵys Qazaqstanda áıelderdi bosandyrýǵa daıyndaıtyn «Bolashaq analar mektebi» ashyldy
ShQO Densaýlyq saqtaý basqarmasy baspasóz qyzmetiniń málimetine súıensek, «Bolashaq analar mektebi» jobasy Óskemendegi Ana men bala ortalyǵynda iske qosyldy. Onda júkti áıelderge kómek kórsetilip, aqyl-keńester beriledi.
«Bolashaq analar mektebi» áıeldi aldaǵy bosanýǵa daıyndaý jáne jańa týǵan náresteni kútý maqsatynda qurylǵan. Bul kýrstar durys tynys alýǵa úıretedi, psıhologııalyq kedergiden ótýge múmkindik beredi», - deıdi ShQO boıynsha bosanǵanǵa deıingi kútim boıynsha úılestirýshi Nadıra Slıamhanova.
Osy jyldyń basynan beri 252 júkti áıelge osyndaı kómek kórsetilgen. Saraptama kórsetkendeı, olardyń 65 paıyzdan astamy asqynýsyz bosanǵan.
Aıta keteıik, óńirdegi árbir júkti áıel óz emhanasynyń dárigerinen joldama alyp, «Bolashaq analar mektebinde» bosanýǵa tegin daıyndala alady.