Shyǵys Qazaqstanda aıazdy kúni jolda qalǵan 3 adam evakýatsııalandy
ÓSKEMEN. QazAqparat – Shyǵys Qazaqstan oblysy Borodýlıha aýdanynda qutqarýshylar aıazdy kúni jolda qalǵan 3 adamdy úılerine jetkizdi, dep habarlaıdy QazAqparat tilshisi.
ShQO tótenshe jaǵdaılar departamenti baspasóz qyzmetiniń málimetine súıensek, 7 qańtar tańǵy saǵat 06:00 shamasynda «Mıtsýbısı Padjero» kóliginiń jolaýshylary qutqarýshylarǵa habarlasyp kómek surady.
Belgili bolǵandaı, aýa temperatýrasynyń kúrt sýytýynyń saldarynan Baryshovka jáne Jernovka aýyldarynyń arasyndaǵy tasjolda kóliktiń dızel otyny qata bastaǵan.
Sol kezde Borodýlıha aýdanynda synap baǵanasy -30 gradýsty kórsetken edi.
«Oqıǵa ornyna kelip jetken qutqarýshylar «Nıva Shevrolet» kóligimen 3 adamdy evakýatsııalady. «Mıtsýbısı Padjero» avtokóligin súıreýge sol mańnan ótip bara jatqan «VAZ 2115» kóliginiń júrgizýshisi kómektesti» dep habarlady vedomstvo ókilderi.
Osy rette TJD turǵyndarǵa alys saparǵa shyqqan kezde Darmen mobıldi qosymshasy arqyly joldardyń jaı-kúıi týraly aldyn ala bilip alýǵa keńes beredi.
