Shyǵys Qazaqstanda aýdandyq máslıhat depýtaty ózine qol saldy

ÓSKEMEN. QazAqparat – Shyǵys Qazaqstan oblysy Zaısan aýdandyq máslıhatynyń depýtaty sýıtsıd jasaǵan, dep habarlaıdy QazAqparat tilshisi.

Áleýmettik jelilerde Zaısan aýdandyq máslıhat depýtatynyń ózine qol jumsaǵany jaıly aqparat tarady.

Aq-qarasyn bilý úshin agenttik tilshisi ShQO polıtsııa departamentine habarlasyp kórdi. Olar aqparatty rastady.

«31 tamyz kúni polıtsııaǵa Zaısan qalasynyń 58 jastaǵy turǵynynyń ózine qol jumsaǵany jaıly habar tústi. Qazir atalǵan fakti boıynsha aýdandyq polıtsııa bólimi sotqa deıingi tergeý amaldaryn bastady. Іstiń mán-jaıyn zertteýdiń jan-jaqtylyǵyn, tolyqtyǵyn jáne obektıvtiligin qamtamasyz etýge baǵyttalǵan sharalar kesheni júrip jatyr. Qajetti sot-medıtsınalyq saraptamalar taǵaıyndaldy. Ózge aqparatty jarııa etýge tyıym salynǵan», - dedi departamenttiń baspasóz hatshysy Tatıana Karpova.

Beıresmı derek boıynsha, máslıhat depýtaty úıinde óz-ózine oq atqan.