Shyǵys Qazaqstanda attestatsııadan óte almaǵan eki ákim jumysynan bosatyldy
ASTANA. QazAqparat - Shyǵys Qazaqstannyń oblys ortalyǵynda ákimshilik memlekettik qyzmetshilerdiń jeke bas qasıetterin baǵalaý boıynsha keshendi attestattaýdyń nátıjeleri jarııalandy, dep habarlaıdy QazAqparat YK-news.kz saıtyna silteme jasap.
Testileý 1 aqpan - 5 sáýir aralyǵynda ótti. Oǵan «B» korpýsynyń 5464 memqyzmetshisi qatysty.
Attestatsııa qorytyndysyna sáıkes, 16 memlekettik qyzmetshi jumysynan bosatyldy, 52 adam laýazymyn tómendetýge usynyldy, 5119 qyzmetker alyp otyrǵan laýazymdaryna sáıkes keledi dep tanylsa, qalǵan 277-si joǵary turǵan qyzmetke usynyldy.
«Jumystan shyǵarylǵandar arasynda aýyldyq okrýgtiń eki ákimi bar - Kókpekti jáne qatelespesem, Ulan aýdandarynyń. Qyzmetinen bosatylǵandar arasynda oblystyq basqarmalardyń mamandary da bar. Jumyspen qamtýdy úılestirý jáne áleýmettik baǵdarlamalar basqarmasynda bas maman óz ornyn bosatty», - dep málim etti QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń ShQO boıynsha departamenti basshysynyń mindetin atqarýshy Janna Qabdoldaqyzy.
Memlekettik qyzmetshilerdi baǵalaý krıterııleri tórt blokqa toptastyryldy: tıimdilik, halyqqa qyzmet etý, ashyqtyq jáne esep berý. Sondaı-aq olardyń jaýapkershilik, bastamashyldyq jáne kúızeliske tózimdilik syndy jeke bas qasıetteri de nazarǵa alyndy.
