Shyǵys Qazaqstanda asyl tuqymdy mal tıelgen kólik joldan shyǵyp ketti
ÓSKEMEN. QazAqparat – Shyǵys Qazaqstan oblysynda mal tıelgen aýyr júk kóligi joldan shyǵyp ketti. Polıtsııa qyzmetkerleri kómekke keldi, dep habarlaıdy QazAqparat óńirlik polıtsııa departamentine silteme jasap.
«Almaty – Óskemen» tasjolynyń 745-shaqyrymynda qatty jel men kóktaıǵaqtan fýra joldan shyǵyp ketti. Júrgizýshiniń aıtýynsha, ol 45 bas asyl tuqymdy iri qara mal tıelgen tirkemesimen oblys ortalyǵyna kele jatqan. Alaıda, aýa raıynyń qolaısyzdyǵynan osyndaı keleńsiz jaǵdaıǵa tap bolǵan.
Habar túse salysymen polıtsııa qyzmetkerleri jedel oqıǵa ornyna jetti. Tártip saqshylary DEÝ-1 qyzmetkerlerimen birge júrgizýshige kómek kórsetti. Barlyǵy kúsh salyp, aqyry kólikti qaýipsiz jerge súırep apardy.
Keıin anyqtalǵandaı, avtokóliktiń elektr jabdyǵy buzylyp qalǵan. Aqaý jóndelgen soń júrgizýshi polıtseılerge alǵysyn aıtyp, saparyn ári qaraı jalǵastyrdy.
Shyǵys Qazaqstan oblystyq polıtsııa departamenti borandy kúni saparǵa shyǵar aldynda joldyń ashyq nemese jabyqtyǵyn aldyn ala tekserip, jolda barynsha abaı bolýǵa shaqyrady.
