Shyǵys Qazaqstanda apaly-sińlili 4 qyz gazdan ýlandy
ÓSKEMEN. QazAqparat - Shyǵys Qazaqstan oblysynyń Zaısan aýdanynda apaly-sińlili 4 qyzǵa ys tıgen, dep habarlaıdy QazAqparat Shyǵys Qazaqstan oblystyq tótenshe jaǵdaılar departamentiniń baspasóz qyzmetine silteme jasap.
Búgin tańerteń sheshesi basy qatty aýyrǵan tórt qyzyn aýrýhanaǵa ákelgen. Dárigerler qyzdardyń gazdan ýlanǵanyn anyqtady. 2009, 2011 jáne 2014 jyly týǵan úsh qyzda ýlanýdyń ortasha deńgeıi, al 2018 jylǵy kenje qyzynda jeńil deńgeıi anyqtaldy. Qazir olar aýrýhanada em-dom alyp jatyr.
Dárigerler oqıǵa týraly órt sóndirýshilerge habar bergen. Zaısan aýdandyq tótenshe jaǵdaılar bóliminiń ınspektorlary zardap shekken qyzdardyń úıine baryp, oqıǵaǵa qatty otyn jaǵylatyn peshtegi aqaý sebep bolǵanyn anyqtady. Úı ıeleriniń aıtýynsha, peshtiń murjasy sońǵy ret aldyńǵy jyly tazartylypty.
«Pesh aqaýlary, murjanyń taza bolmaýy saldarynan adamdar jıi zardap shegedi. Kún saıyn aıtylatyn eskertýlerge qaramastan, kóptegen adamdar órt qaýipsizdigine jete mán bermeıdi. Jylý maýsymynyń basynan beri oblysta ıis gazynan 80 adam, sonyń ishinde 39 bala zardap shegip, 8 adam qaza tapqan», - deıdi ShQO TJD baspasóz hatshysy Anastasııa Sklıar.
Qutqarýshylar peshterdi jylý maýsymynyń aldynda tekserip, kem degende 2 aıda 1 ret tazalap otyrý qajettigin aıtady.
Aıta keteıik, jylý maýsymy resmı túrde 15 sáýirde aıaqtalady. Degenmen turǵyndar odan keıin de pesh jaǵa beredi.
