Shyǵys Qazaqstanda altyn óndirýdi eki ese arttyrady
ÓSKEMEN. QazAqparat - Qazaqstanda altyn qorynyń kólemi boıynsha ekinshi orynda turǵan «Polımetall» kompanııasy jyldy qorytyndylap, 2017 jylǵa arnalǵan josparlarymen, sonyń ishinde Qazaqstandaǵy eki joba - Shyǵys Qazaqstan oblysyndaǵy «Qyzyl» jáne Qostanaı oblysyndaǵy Varvarınskıı týraly aqparatymen bólisti, dep habarlaıdy «QazAqparat» HAA tilshisi.
Kompanııanyń baspasóz qyzmeti jarııalaǵan habarlamada «Polımetall» tobynyń bas atqarýshy dırektory Vıtalıı Nesıstiń pikiri keltirilgen. Ol kompanııanyń erkin aqsha aǵynynyń turaqtylyǵyn saqtap jáne aktsıonerlerge kólemdi dıvıdendter tóleı otyryp, oń óndiristik nátıjelerge qol jetkizetinin atap ótti.
«2016 jyly, osymen besinshi jyl qatarynan óndiristik jospardy oryndap kelemiz. 2017 jyly erkin aqsha aǵynyn qurýǵa, dıvıdendter tóleýge, Qyzyldaǵy qurylys jumystaryn jáne uzaqmerzimdi jobalardy aıaqtaýǵa kóńil bólemiz», - dep aıtty V.Nesıs.
Kompanııanyń aqparatyna súıensek, búginde Qyzyldaǵy bos jynystardyń eski qaldyqtaryn kóshirý jumystary tolyǵymen aıaqtalǵan. Qazirgi tańda burǵylaý jumystary jasalýda. 2017 jyly óndiris kólemi eki esege ósýi tıis. Joba jumystary kestege saı júrgizilýde. Injenerlik taldamalar men jobalaý jumystary 2017 jyldyń I toqsanynda aıaqtalady dep kútilýde.
Óńdeýshi fabrıkanyń ǵımaraty turǵyzylyp, kópirli krandar qondyrylǵan. Óńdeýshi qurylǵynyń fýndamenti ázirlenýde. Ken óndirýge arnalǵan qurylǵylardyń alǵashqy toptamasy (qoıyltqysh, keptirgish, elekter) ákelindi.
Syrtqy ınfraqurylym (jol, elektr jaryǵy, sý) daıyn, qazirgi tańda alańnyń ınfraqurylymyn qurý jumystary jasalýda. Qyzyldaǵy alǵashqy kontsentratyn óndirý jospar boıynsha 2018 jyldyń III toqsanynda bastalady.
