Shyǵys Qazaqstanda altyn kenin óndiretin jańa zaýyt salynady
ÓSKEMEN. QazAqparat - Shyǵys Qazaqstan oblysy Jarma aýdanynyń ákimi Nurlan Sydyqov aımaqtyń ortalyq kommýnıkatsııalar qyzmetinde ótken baspasóz máslıhatynda óndiristik ınfraqurylymnyń damýy barysy jaıly málim etti, dep habarlaıdy «QazAqparat» HAA tilshisi.
Onyń aıtýynsha, aǵymdaǵy jylda ónerkásiptik óndiris kólemi shamamen 6,5 mln teńgeni qurady. Aýdanda ındýstrııalyq baǵyttaǵy eki joba júzege asyrylady. «Gornıak óz betimen altyn izdeýshiler arteli» jalpy qýattylyǵy jylyna 250 myń tonna ken quraıtyn altyn kenin óndiretin zaýyt turǵyzady. Jobany júzege asyrýǵa 7,7 mlrd teńge bólingen. Jańǵyztóbe aýylynda «Jańǵyz - Solar» kompanııasy qýattylyǵy 30 megavatt elektr stantsııasynyń qurylysyn daıyndap jatyr.
Joba quny 18 mlrd teńgeni quraıdy. N.Sydyqov ShQO boıynsha Jarma aýdany basqa óńirlermen salystyrǵanda áleýmettik-ekonomıkalyq damý jaǵynan aldyńǵy orynǵa ıe ekenin atap ótti.
«Sońǵy úsh jylda respýblıkalyq tasjoldary boıynda «Kerýen», «Maraldy», «Jol bolsyn» syndy iri jol boıyndaǵy kempıngter salynyp, jolaýshylarǵa barlyq qajetti qyzmetterdi usynyp otyr. Burynǵy aýdandyq avtovokzal bazasynda 20 oryndyq keshen paıdalanýǵa berildi, oǵan qonaqúı, ashana jáne avtovokzal kiredi», - dedi N.Sydyqov.
