Shyǵys Qazaqstanda 8 jasar qyz kólge batyp ketti
ULAN AÝDANY. QazAqparat - Shyǵys Qazaqstan oblysynyń Ulan aýdanynda 8 jasar bala sýǵa ketti, dep habarlaıdy QazAqparat oblystyq tótenshe jaǵdaılar departamentine silteme jasap.
Departamenttiń málimetinshe, keshe Ulan aýdanynyń turǵyny balasynyń Dýbyǵaly kólinde joǵalyp ketkenin aıtyp, kómek suraǵan. Tavrıcheskoe aýylynyń qutqarýshylary birden balany izdeýge kiristi. Olar kóldiń aınalasyn, jaǵalaýyn, taý-tasty túgel aralap, balany izdedi. Sodan keıin Óskemen qutqarý jasaǵynyń súńgýirleri sý astynan qaraı bastady.
«2012 jyly týǵan qyz balanyń denesi jaǵalaýdan 5 metr jerde úsh metr tereńdikte jatyr eken. Qaıǵyly oqıǵaǵa balanyń qaraýsyz qalyp qoıýy sebep bolǵan. Bul máseleni aımaq qutqarýshylary únemi aıtyp, ata-analarǵa eskertip keledi. Bıyl óńirde balanyń sýǵa ketýi birinshi ret tirkelip otyr» dep málim etti TJD baspasóz qyzmeti.
Qutqarýshylar ata-analarǵa jaǵalaýda demalǵan kezde barynsha abaı bolyp, balasyn qaraýsyz qaldyrmaý kerektigin eske salady.
