Shyǵys Qazaqstanda 7 uıaly telefondy túrmege kirgizbek bolǵan er adam ustaldy
ÓSKEMEN. QazAqparat - Shyǵys Qazaqstan oblysynda uıaly telefondar partııasyn túzetý mekemesine kirgizbek bolǵan er adam ustaldy, dep habarlaıdy QazAqparat tilshisi.
ShQO boıynsha qylmystyq atqarý júıesi departamenti baspasóz qyzmetiniń málimetine súıensek, 32 jastaǵy er adam 7 uıaly telefondy aýyr júk kóligine tıelgen qumǵa jasyryp ótýge tyrysqan.
- OV 156/3 kolonııasynyń qyzmetkerleri mekeme aýmaǵyna tyıym salynǵan zattardy kirgizý dereginiń aldyn aldy. Mekemeniń óndiristik aýmaǵyna qum ákelgen KaMAZ kóligin tekserý kezinde skotchpen oralǵan eki túıinshek tabylǵan. Onyń ishinde jeti uıaly telefon men 5 sımkarta anyqtaldy. Túıinshekterdi qumǵa asyra oılastyrylǵan aılamen jasyrǵan, - deıdi túzetý mekemesiniń bastyǵy Tileýbergen Kónekbaev.
Atalǵan fakti boıynsha er adam QR ÁQBK-niń 481-baby 1-bóligine sáıkes ákimshilik jaýapkershilikke tartylmaq.
