Shyǵys Qazaqstanda 7 682 úıdi sý basý qaýpi bar
ÓSKEMEN. QazAqparat – Shyǵys Qazaqstan oblysynda kóktem kezinde 7 682 úıdi sý basý qaýpi bar , dep habarlaıdy QazAqparat tilshisi.
ShQO Tótenshe jaǵdaılar departamenti baspasóz qyzmetiniń málimetine súıensek, oblys ózenderindegi sýdyń tasýy naýryzdyń ekinshi onkúndiginde bastalyp, maýsymnyń ekinshi onkúndiginiń ortasyna deıin sozylady.
«Búginde óńir boıynsha 108 eldi mekende 23 576 adam turatyn 7 682 úıdi sý basý qaýpi bar. Atalǵan ýchaskelerge monıtorıng júrgizilýde. Kúrshim, Buqtyrma, Turǵysyn ózenderi, Kishi Úlbi sý qoımasy tekserildi. Oblysta joǵary daıyndyq rejımi engizilgen. Ákimdikter óz aýmaǵynda táýlik boıy kezekshilik uıymdastyrdy», - dedi TJD tótenshe jaǵdaılardyń aldyn alý basqarmasynyń bastyǵy Alekseı Shtykel.
Qazirgi ýaqytta Shyǵys Qazaqstanda 304 myń tekshe metr qar shyǵaryldy. Kólik jáne temir joldardaǵy sý ótkizý qurylystary, kópirler, aryqtar men kanaldar tazartylǵan. 104 myń dana ydys-qap, 6,7 myń tonna ınertti materıal daıyndaldy.
3 naýryzdan bastap oblystyń 7 aýdanyndaǵy Buqtyrma, Ertis, Kúrshim, Úbe ózenderinde muzdy jarý jumystary bastaldy.
Jalpy sany 2000 tehnıka men 200 motopompa saqadaı saı. 111 evakýatsııalyq pýnkt, 1000 jatyn oryn daıyndaldy.
