Shyǵys Qazaqstanda 6 myńnan astam jumys orny ashyldy
Bul jaıly aımaq basshysy Danıal Ahmetov Prezıdent Qasym-Jomart Toqaevtyń «Halyq birligi jáne júıeli reformalar – eldiń órkendeýiniń berik negizi» atty Joldaýyn talqylaý maqsatynda ákimdikte ótken jınalys barysynda aıtty.
«Joldaýda aıtylǵan bastamalardyń biri – 2022-2025 jyldar aralyǵynda bıýdjet salasynyń keıbir qyzmetkerleriniń jalaqysyn jyl saıyn 20 paıyzǵa arttyrý. Bul sheshim 42 myńǵa jýyq jerlesimizge qatysty bolmaq. Sondaı-aq Memleket basshysynyń zeınetaqy qoryndaǵy jetkiliktilik sheginen asatyn jınaqty «Otbasy bankine» aýdarýǵa ruqsat berý kerek dep sanaıtyny erekshe mańyzǵa ıe. Prezıdenttiń alǵa qoıǵan jańa maqsattary bizge strategııalyq mindetterge sáıkes, shekara mańyndaǵy aýmaqtar men burynǵy aýdan ortalyqtaryn damytýdy eskere otyryp, oblystyń damý josparyn aıqyndaýǵa múmkindik beredi», - dedi oblys ákimi.
Onyń aıtýynsha, bıznesti keńinen qoldaý boıynsha jumys júıeli túrde jalǵasatyn bolady. Sońǵy 2 jylda óńirde 3 myńǵa jýyq jobany iske asyrýǵa memleket tarapynan 5,4 mlrd teńge bólingen.
«Sonyń nátıjesinde 6,2 myń jańa jumys orny quryldy. Óńirdiń eksporttyq áleýetin 1,5 ese ulǵaıtý máselesin sheshý úshin birqatar iri kásiporyndar modernızatsııalanyp, «Aqtoǵaı» KBK men «Úlbi-TVS» JShS janarmaı jınaý zaýytyn keńeıtý sııaqty jańa jobalar iske asyrylatyn bolady», - dedi Danıal Ahmetov.
