Shyǵys Qazaqstanda 500-den astam páter zańsyz jalǵa berilgen
ÓSKEMEN. QazAqparat – Shyǵys Qazaqstan oblysynda zańsyz jalǵa berilgen 500-den astam páter anyqtaldy, dep habarlaıdy QazAqparat tilshisi.
ShQO Polıtsııa departamenti baspasóz qyzmetiniń málimetine súıensek, polıtseıler óńir aýmaǵynda «Ýchaske» jedel-aldyn alý sharasyn júrgizýde. Sonyń aıasynda 267 000-nan astam páter, 206 000-ǵa jýyq jeke turǵyn úı jáne 51 594 saıajaı tekserildi. Budan bólek, 5 691 sharýa qojalyǵynda, qystaqtarda, bazarlar men ózge de saýda oryndarynda 1 784 reıd júrgizildi. Nátıjesinde, belgili turǵylyqty jeri joq 521 adam anyqtalǵan.
«Salyq organdarynda tirkeýsiz turǵyn úıdi jalǵa berýdiń 501 faktisi tirkeldi. Tıisti aqparat Memlekettik kirister departamentine joldandy. Sonymen qatar ishki ister organdarynda esepte turǵan 37 000-nan astam adam turǵylyqty jeri boıynsha tekserildi», - delingen habarlamada.
Ákimshilik jaýapqa tartylǵandar sany – 32 312 adamdy qurap otyr. Zańsyz aınalymnan tirkelmegen 31 atys qarýy tárkilengen.
Aıta keteıik, jedel aldyn alý sharasy osy jyldyń 1 jeltoqsanyna deıin jalǵasady.
