Shyǵys Qazaqstanda 5 mekteptiń qurylysy aıaqtalýǵa jaqyn
ShQO ákimdiginiń málimetine súıensek, búgingi tańda Rıdder qalasynda jáne Ulan aýdany Qasym Qaısenov kentinde 600 oryndyq bilim berý mekemeleriniń qurylysy aıaqtalýda. Semeıdegi eki mektep te salynyp bitýge jaqyn. Tek aýmaqty abattandyrý ǵana qaldy. Al Shemonaıha aýdanyndaǵy mektep jeke ınvestıtsııalar esebinen salynýda.
«Aldaǵy ýaqytta oń nátıje bergen úlgilik jobalardy paıdalana otyryp, Urynhaıka, Jolmuqaý, Sheńgeldi, Malaq, Jylandy, Qapaı batyr jáne Keńtarlaý aýyldarynda birneshe shaǵyn jınaqty mektepter salamyz. Úlgilik jobalar bıýdjetti jańa qujattamaǵa jumsamaýǵa múmkindik beredi. Sondaı-aq osy jobalarmen jumys istegen merdiger kompanııalar ózderin jaqsy jaǵynan kórsete bildi», - deıdi aımaq basshysy Danıal Ahmetov.
Qazirgi tańda Óskemen, Aıagóz, Semeı qalalarynda mektep salý boıynsha konkýrstyq rásimder aıaqtalýda.
«Bilim basqarmasyna oqý oryndaryn qaıda jáne qansha orynǵa salý kerektigi týraly derekterdi naqtylaýdy tapsyrdym. Sonymen qatar mektep-ınternattar salý máselesin de qarastyrý qajet. Balalarǵa sapaly bilim berý - bul eń negizgi baǵyt. Sondyqtan jańa mektepter zamanaýı bilim berý júıesiniń barlyq talaptaryna saı salynýy kerek», - dedi oblys ákimi.