Shyǵys Qazaqstanda 45 gektarǵa jaıylǵan dala órti aýyzdyqtaldy

ÓSKEMEN. QazAqparat – Shyǵys Qazaqstan oblysynda 45 gektarǵa jaıylǵan dala órti aýyzdyqtaldy, dep habarlaıdy QazAqparat tilshisi.

ShQO tótenshe jaǵdaılar departamenti baspasóz qyzmetiniń málimetine súıensek, órt 24 sáýirde Zaısan aýdanynda shyqqan.

«Qarabulaq aýylynan 15 shaqyrym jerde qamys pen shóp órtendi. Oqıǵa ornyna órt sóndirýshiler shuǵyl kelip jetti. Ekpini sekýndyna 8-den 10 metrge deıingi jel men jetýi qıyn batpaqty jer jaǵdaıdy qıyndatyp jiberdi», - delingen aqparatta.

Jergilikti atqarýshy organdar men TJD qyzmetkerleriniń birlesken is-qımyldarynyń arqasynda 45 gektar aýmaqqa jaıylǵan qyzyl jalyn tolyqtaı aýyzdyqtaldy.

Tilsiz jaýmen kúreske barlyǵy 62 adam men 12 tehnıka jumyldyryldy.

Aıta keteıik, qutqarýshylar órt shyqqandyǵyn ǵarysh arqyly monıtorıng jasaýdyń arqasynda anyqtaǵan.