Shyǵys Qazaqstanda 42 myńnan astam adamǵa vaktsına salyndy
ÓSKEMEN. QazAqparat – Shyǵys Qazaqstan oblysynda 42 myńnan astam adam koronavırýsqa qarsy vaktsına aldy, dep habarlaıdy QazAqparat tilshisi.
ShQO Densaýlyq saqtaý basqarmasynyń málimetine súıensek, 26 sáýirdegi jaǵdaı boıynsha óńirde 42 200 adam vaktsınanyń birinshi komponentin alǵan. Al 9 073 adam revaktsınatsııadan ótti. Onyń ishinde 1155 memlekettik qyzmetker, sozylmaly aýrýlarmen aýyratyn 3617 adam, 10 655 medıtsına qyzmetkeri, 6020 muǵalim, medıtsınalyq-áleýmettik jáne jabyq balalar mekemeleriniń 1213 mamany, 5681 quqyq qorǵaý jáne qaýipsizdik organdarynyń ókili, 639 ýchaskelik polıtsııa qyzmetkeri bar.
Sonymen qatar koronavırýsqa qarsy vaktsınany tamaq ónimderin shyǵaratyn kásiporyndardyń 184 qyzmetkeri, ónerkásiptik kásiporyndardyń 1220 mamany, saýda fırmalarynyń 103 jumysshysy, temirjol salasynyń 59 qyzmetkeri jáne vahtalyq ádispen jumys isteıtin 27 adam alǵan. Ekpe saldyrǵandar arasynda stýdentter sany – 195.
«23 sáýirde óńirimizge vaktsınanyń birinshi komponentiniń 9 myń dozasy, ekinshi komponentiniń 24 myń dozasy jetkizildi. Jalpy oblysta 334 vaktsınatsııa pýnkti jumys istep tur. Onyń 8-i Óskemen men Semeı shaharlarynyń saýda ortalyqtarynda, al bireýi «Halıfa Altaı» meshitinde ornalasqan», - dedi ShQO Densaýlyq saqtaý basqarmasynyń basshysy Ermek Omarbekov.
