Shyǵys Qazaqstanda 42 gektarǵa jaıylǵan alapat órt aýyzdyqtaldy
ÓSKEMEN. QazAqparat – Shyǵys Qazaqstan oblysy Samar aýdanynda iri dala órti aýyzdyqtaldy, dep habarlaıdy QazAqparat tilshisi.
ShQO tótenshe jaǵdaılar departamenti baspasóz qyzmetiniń málimetine súıensek, 5 tamyz kúni Samar aýdanynda shóp órtengen.
Jalpy aýdany 42 gektarǵa jetken qyzyl jalynmen kúres 3 kúnge sozyldy.
«Búgin saǵat 13.45 shamasynda órt aýyzdyqtaldy. Tilsiz jaýdy sóndirýge jergilikti atqarýshy organdardyń, TJD órt sóndirý bólimsheleriniń, Krasnogor jáne Qaıyndy ormanshylyqtarynyń, Sarybel tirek pýnktiniń kúsh-quraldary jumyldyryldy», - dep habarlady vedomstvo ókilderi.
Órt orman qory men eldi mekenderge jetpedi.
Esterińizge sala ketsek, osyǵan deıin Shyǵys Qazaqstanda órt sóndirýshilerdiń iri dala órtimen kúresip jatqanyn habarlaǵan edik.
