Shyǵys Qazaqstanda 4 balany qaqqan mas júrgizýshi alty jylǵa sottaldy
ÓSKEMEN. QazAqparat – Shyǵys Qazaqstan oblysy Borodýlıha aýdanynda 4 balany qaǵyp ketken júrgizýshige qatysty sot úkimi shyqty, dep habarlaıdy QazAqparat tilshisi.
Aýdandyq sottyń málimetine súıensek, Jańa Shúlbi aýylynyń turǵyny ishimdik iship alyp, Mitsubishi avtokóligin tizgindegen.
Kenet kólik joldan shyǵyp ketip, jer úıdiń syrtynda oınap júrgen tórt qyzdy qaǵyp ketti.
Saraptama nátıjesi kórsetkendeı, 31 jastaǵy er adam qatty mas bolǵan.
Qyzdardyń jasy – 12, 11, 10 jáne 6-da. Jol apaty saldarynan 10 jastaǵy bala sol jerde mert boldy, taǵy ekeýi aýyr dene jaraqatyn alǵan.
Sot sheshimimen aıyptalýshy QR Qylmystyq Kodeksiniń 345-baby 3-bóligimen kináli dep tanylyp, úsh jarym jylǵa bas bostandyǵynan aıyryldy.
Jábirlenýshi tarap bul sheshimmen kelispeı, jazany qatańdatýdy surap, apellıatsııaǵa berdi.
ShQO soty úkimdi ózgerissiz qaldyrǵan.
Alaıda Joǵarǵy sot Borodýlıha aýdandyq jáne oblystyq sottardyń sheshimin buzyp, isti jańa talqylaýǵa jibergen.
Apellıatsııalyq úkim boıynsha Jańa Shúlbi aýylynyń turǵyny alty jylǵa túrmege qamaldy.
