Shyǵys Qazaqstanda 345 myńnan astam adam revaktsınatsııadan ótti

ÓSKEMEN. QazAqparat – Shyǵys Qazaqstan oblysynda 345 myńnan astam adam koronavırýsqa qarsy revaktsınatsııadan ótti, dep habarlaıdy QazAqparat tilshisi.

ShQO Densaýlyq saqtaý basqarmasy baspasóz qyzmetiniń málimetine súıensek, óńirde COVID-19 ınfektsııasyna qarsy amerıkalyq Pfizer vaktsınasyn saldyrý naýqany jalǵasýda.

«Aımaq boıynsha atalǵan ekpeniń birinshi komponentin 104 589 adam saldyrdy. Onyń ishinde 12-18 jas aralyǵyndaǵy 92 629 bala bar. Olardy vaktsınalaý tek ata-anasynyń ruqsatymen júrgizilýde. Sondaı-aq 3446 júkti jáne 8514 bala emizetin áıel ekpe alǵan», - delingen aqparatta.

Budan bólek, oblysta 60 jastan asqan qarttar men medıtsına qyzmetkerleri Pfizer ekpesimen revaktsınatsııadan ótýde. Qazir osy sanattaǵy 13 246 adam úshinshi ret vaktsına alyp otyr. Al jalpy Shyǵys Qazaqstanda 345 myńnan astam adam revaktsınatsııadan ótti.