Shyǵys Qazaqstanda 32 jylqy urlaǵan barymtashy ustaldy
ÓSKEMEN. QazAqparat – Shyǵys Qazaqstan oblysynda 32 jylqy urlaǵan barymtashy ustaldy, dep habarlaıdy QazAqparat tilshisi.
ShQO polıtsııa departamenti baspasóz qyzmetiniń málimetine súıensek, Semeıde polıtsııaǵa aryz túsirgen sharýa qojalyǵynyń ıesi erkin jaıylymnan 15 bas jylqysynyń joǵalǵanyn jetkizdi. Osynyń saldarynan oǵan 3 mıllıon teńgeden astam materıaldyq zalal keltirilgen.
Atalǵan fakti QR Qylmystyq kodeksiniń 188-baby 2-bóliginiń 1-tarmaǵy boıynsha sotqa deıingi tergeýdiń biryńǵaı tizilimine engizilip, tártip saqshylary birden jedel-izdestirý sharalaryna kiristi.
Jedel ýákilder ýchaskelik ınspektorlarmen birge jaqyn mańdaǵy barlyq aýmaqtardy aralap, kýágerlerden jaýap aldy, mal tasymaldaıtyn avtokólikterdi jáne et pen mal satatyn oryndardy muqııat teksergen.
«Polıtsııa qyzmetkerleri qysqa merzimde mal urlyǵyna qatysty kúdiktini ustady. 47 jastaǵy jergilikti turǵyn óz kinásin tolyqtaı moıyndaǵan. Tergeý barysynda ótken jyldyń aıaǵynan bastap osy ýaqytqa deıin er adamnyń atalǵan sharýa qojalyǵy aýmaǵynan 32 bas jylqy urlaǵany belgili boldy», - dedi ShQO PD bastyǵy Saǵat Mádıev.
Kúdikti ýaqytsha ustaý ızolıatoryna qamaldy. Qazirgi ýaqytta sotqa deıingi tergeý amaldary júrgizilýde.
Sonymen qatar urlanǵan jylqylardy satyp alǵan adam anyqtaldy. 52 jastaǵy qala turǵyny 12 bas jylqyny alyp, onyń 11 basyn basqaǵa satyp jibergen.
