Shyǵys Qazaqstanda 300 gektar aýmaqtaǵy shóp órtendi
NUR-SULTAN. QazAqparat - Shyǵys Qazaqstan oblysy Ulan aýdanynda 300 gektar aýmaqtaǵy shóp órtendi. Bul týraly QR ІІM Tótenshe jaǵdaılar komıtetinde ótken brıfıngte aıtyldy, dep habarlaıdy QazAqparat tilshisi.
«23 qyrkúıek kúni saǵat 15:48-de órtke qarsy qyzmet pýltine ShQO, Kókpekti aýdanynyń «Qoıtas» ýchaskesinde qurǵaq shóptiń janǵany týraly habarlama kelip tústi. Órttiń aýmaǵy - shamamen 45 ga. Órt daıyndalǵan oramdaǵy 40 tonna shópti kúlge aınaldyrdy», - deıdi QR ІІM Tótenshe jaǵdaılar komıtetiniń tóraǵasy Vladımır Bekker.
Qazirgi ýaqytta órttiń shyǵý sebebi anyqtalyp jatyr. Órt ornyna Tótenshe jaǵdaı departamentinen 6 qyzmetker men 2 tehnıka, jergilikti atqarýshy organdardan 12 qyzmetker men 3 tehnıka barǵan.
«Sondaı-aq, keshe saǵat 18:20-da ShQO, Ulan aýdanyndaǵy «Kókbýha» ýchaskesinde qurǵaq shóp janǵany týraly aqparat kelip tústi. Tańǵy saǵat 08:00-ge deıin órt aýmaǵy shamamen 300 gektarǵa jetken. Órtti sóndirýge TJD qyzmetkerleri men «Orman sharýashylyǵy» KMM kúshi jumyldyryldy. Saǵat 09:00-de «Orman qorǵaý» memlekettik mekemesiniń tikushaǵy oqıǵa ornyna bardy», - deıdi ol.
Órt sóndirý úshin qandaı qosymsha tehnıkalar kerek ekeni anyqtalýda. Órtten eshkim zardap shekken joq, sonymen qatar eldi mekenderge de qaýip tónbedi.
Tótenshe jaǵdaılar komıteti tóraǵasynyń aıtýynsha, ótken táýlikte elimizde 52 órt, 34 apattyq-qutqarý sharasy bolyp, 19 adam qutqarylǵan jáne 12 adam evakýatsııalanǵan.
