Shyǵys Qazaqstanda 300-den astam balany kene shaqty
ShQO Sanıtarııalyq-epıdemıologııalyq baqylaý departamenti baspasóz qyzmetiniń málimetine súıensek, óńirde sáýir aıynda kene taralý maýsymy bastalǵan. Sol ýaqyttan bastap osy kúnge deıin barlyǵy 1057 adam keneden zardap shegip otyr. Onyń ishinde 327-i - 14 jasqa deıingi balalar.
«1016 adam profılaktıkalyq maqsatta kene entsefalıtine qarsy ımmýnoglobýlın aldy. Qalǵandary aýrýhanaǵa kesh júginý, medıtsınalyq qarsy kórsetilimder syndy sebepterge baılanysty ekpe alǵan joq. Sondaı-aq Óskemen qalasynda kene entsefalıti vırýsyna shaldyǵýdyń bir jaǵdaıy tirkeldi. Naýqas qazir aýrýhanada jatyr», - delingen aqparatta.
Aıta keteıik, Shyǵys Qazaqstan oblysy respýblıkada kene entsefalıtin juqtyrý qaýpiniń «joǵary» aımaǵyna jatady. Óńirdegi Glýbokoe, Altaı, Zaısan, Katonqaraǵaı, Ulan, Shemonaıha, Samar aýdandarynda jáne Rıdder, Óskemen qalalarynda kene entsefalıtiniń oshaǵy kóp.