Shyǵys Qazaqstanda 3 iri órt sóndirildi
ÓSKEMEN. QazAqparat – Shyǵys Qazaqstan oblysy Kókpekti, Zaısan jáne Kúrshim aýdandarynda bolǵan úsh iri órt sóndirildi, dep habarlaıdy QazAqparat tilshisi.
ShQO Tótenshe jaǵdaılar departamenti baspasóz qyzmetiniń málimetinshe, №33 órt sóndirý bóliminiń qyzmetkerleri habar túse sala 85 shaqyrym qashyqtyqtaǵy Kókpekti aýdanynyń Tassaı aýyldyq okrýginde bolǵan órtti sóndirýge attanǵan. Mal sharýashylyǵy bazasy ǵımaratynyń shatyryn jóndeý kezinde 300 sharshy metr aýmaqtaǵy aǵash konstrýktsııalardy jáne 500 sharshy metr aýmaqtaǵy qoqysty jalyn sharpyǵan. Tilsiz jaýdy aýyzdyqtaýǵa 8 adam men 2 tehnıka jumyldyryldy.
«Dál osy ýaqytta Zaısan aýdanynda órt sóndirýshiler 500 sharshy metr aýmaqtaǵy órtti sóndirdi. Demontaj jasalyp jatqan nysan otqa oranǵan. Aldyn ala málimet boıynsha tilsiz jaý sol mańaıyndaǵy qurylys qaldyqtarynan shyqqan. № 25 órt sóndirý bóliminiń 5 adamy jalyndy aýyzdyqtady», - dep habarlady vedomstvo ókilderi.
Úshinshi iri órt Kúrshim aýdany Oń Qaljyr aýylynda boldy. Munda sharýashylyq qora-jaılar, shóp pen qoqys órtengen. Túni boıy Marqakól kentindegi órt sóndirý bóliminiń qyzmetkerleri, ormanshylar men turǵyndar qyzyl jalyndy óshirýge tyrysty.
«Órt jalpy aýmaǵy 271 sharshy metrdi quraıtyn 4 sharýashylyq qora-jaıdy jáne 6 tonna shópti sharpyǵan. Jalpy aýdany – 500 sharshy metr. Úsh oqıǵada da zardap shekkender joq. Tilsiz jaýdyń shyǵý sebebi – otty abaısyz paıdalanýdan bolýy múmkin», - delingen TJB málimetinde.
