Shyǵys Qazaqstanda 3 adam sýǵa ketip, kóz jumdy
SEMEI. QazAqparat - Ótken demalys kúnderi Shyǵys Qazaqstan oblysynda 3 adam sýǵa batyp, kóz jumdy. Bul týraly QazAqparat oblystyq TJD baspasóz qyzmetine silteme jasap habarlaıdy.
Qaıǵyly oqıǵanyń biri 11 tamyz kúni Zyrıan aýdanynda tirkeldi. 49 jastaǵy azamat dostarymen birge Oktıabrskıı kentindegi Buqtyrma sý qoımasyna demalýǵa barǵan. Ol qolaısyz aýa-raıyna qaramastan rezeńke qaıyqqa otyryp, júrip qaıtpaq bolǵan. Alaıda sol kúıi iz-tússiz ketken. Qutqarýshylarǵa dostary habar bergen. Oqıǵa ornyna jetken sýdan qutqarý qyzmetiniń qutqarýshylary jaǵadan 3 shaqyrym jerden azamat otyrǵan qaıyqty tapty. Biraq denesin izdestirý jumystary jalǵasyp jatyr.
Ekinshi oqıǵa Ulan aýdanynyń Aıyrtaý aýylynda tirkeldi. Bir top adam shomylýǵa tyıym salynǵan orynǵa baryp, sýǵa túsken. Demalýshylardyń biri jaǵadan uzap, shomylyp júrgen kezde batyp ketken. Oqıǵa ornyna kelgen qutqarýshylar 44 jastaǵy azamattyń denesin 6 metr tereńdikten alyp shyqty. Sonymen qatar, qutqarýshylar «Rýda emes materıaldar kombınaty» sý qoımasynan 31 jastaǵy azamattyń denesin alyp shyqty. 2 jigit belgilenbegen jerge sýǵa túsken. Tipti syrt kıim jáne aıaq kıimderimen sýda júzgen. Qutqarýshylardyń sózinshe, sýǵa ketken azamattyń jaǵaǵa shyǵýyna ústindegi kıimi de kedergi jasaǵan.
«Qaıǵyly oqıǵalardyń kóbi ruqsat etilmegen oryndarda tirkeledi. Sebebi, bul jerlerde sý aǵyny qatty jáne shuńqyrlar kóp. Tipti sýdyń tereńdigi 20 metrge deıin jetedi. Biraq turǵyndar soǵan qaramastan kelip shomylady. Saldarynan qaıǵyly jaǵdaılar oryn alyp jatyr» delingen habarlamada.
