Shyǵys Qazaqstanda 22 jastaǵy jigit sýǵa batyp ketti
ÓSKEMEN. QazAqparat – Shyǵys Qazaqstan oblysy Ulan aýdanyndaǵy Sibe kóline 22 jastaǵy jigit batyp ketti, dep habarlaıdy QazAqparat tilshisi.
ShQO tótenshe jaǵdaılar departamenti baspasóz qyzmetiniń málimetine súıensek, oqıǵa 13 maýsymda Ulan aýdanyndaǵy ruqsat etilmegen jaǵajaıda bolǵan.
«Sibe kóline demalýǵa barǵan 22 jastaǵy jigit shomylý tyıym salynǵan jerde sýǵa tústi. Onyń batyp bara jatqanyn sol mańdaǵy adamdar kórip qalyp, kómekke umtylǵan. Sýdan alyp shyǵyp, jasandy dem bermek boldy. Alaıda er adamnyń ómirin qutqaryp qala almady», - delingen aqparatta.
Osy rette, qutqarýshylar óńir jurtshylyǵyna shomylýǵa tyıym salynǵan ýchaskelerge barmaýǵa shaqyrady.
Esterińizge sala ketsek, osyǵan deıin Semeıde 15 jastaǵy jasóspirim sýǵa batyp ketkenin habarlaǵan edik.
