Shyǵys Qazaqstanda 218 adam zańsyz ań aýlaǵan
ShQO Polıtsııa departamenti baspasóz qyzmetiniń málimetine súıensek, óńirde brakonerliktiń jolyn kesý, bıologııalyq resýrstar nysandarynyń zańsyz aınalymy jáne qoldanystaǵy zańnamany buzýǵa qatysty ózge de zańbuzýshylyqtardy anyqtaý maqsatynda «Brakoner» jedel aldyn alý sharasy júrgizilgen. Sonyń nátıjesinde 400-den astam ákimshilik quqyqbuzýshylyq tirkelip, 3 mln teńgege jýyq aıyppul salyndy.
«Onyń ishinde ań aýlaý erejelerin buzǵany úshin 218, balyq aýlaý erejelerin saqtamaǵan 154 adam jazaǵa tartyldy. Sondaı-aq ekologııalyq qylmystyń 11 faktisi anyqtaldy», - dep habarlady vedomstvo ókilderi.
Máselen, «Omby-Maıqapshaǵaı» tasjolyndaǵy Taıjúzgen ýchaskesinde tártip saqshylary VAZ 2107 avtokóligin toqtatqan. Tekserý barysynda júrgizýshiniń jalpy salmaǵy 79 keli tartatyn shortan balyǵyn tıisti qujattarsyz tasymaldaǵany belgili boldy. Atalǵan fakti Qazaqstan Respýblıkasy Qylmystyq kodeksiniń 335-baby 1-bólimi boıynsha sotqa deıingi tergeýdiń biryńǵaı tizilimine tirkeldi. Qazirgi ýaqytta Tuǵyl aýylynyń turǵynyna qatysty tergeý amaldary júrgizilýde.