Shyǵys Qazaqstanda 2 tonna solıarka tıep kele jatqan júk kóligi aýdarylyp qaldy

ÓSKEMEN. QazAqparat – Shyǵys Qazaqstan oblysy Kúrshim aýdanynda 2 tonna solıarka tıep kele jatqan júk kóligi aýdarylyp qaldy, dep habarlaıdy QazAqparat tilshisi.

Kúrshim aýdany ákimdiginiń málimetine súıensek, oqys oqıǵa 20 shilde kúni Býrabaı aýylynyń mańynda bolǵan.

«2 tonna solıarka tıep kele jatqan júk kóligi aýdarylyp qaldy. Abyroı bolǵanda, zardap shekken eshkim joq. Sol jerge kelip jetken polıtsııa qyzmetkerleri tekserý jumystaryn júrgizýde. Oqıǵanyń tolyq mán-jaıy sodan keıin belgili bolady», - delingen aqparatta.

Eske salsaq, 7 shilde kúni dál osy Kúrshim aýdanynda 23 tonna kúkirt qyshqylyn tıep kele jatqan júk kóligi aýdarylyp túsken bolatyn. Sonyń saldarynan jerge 20 tonnaǵa jýyq kúkirt qyshqyly tógilgen edi.