Shyǵys Qazaqstanda 2-9 naýryz aralyǵynda qar kóshkini júrý qaýpi bar
ÓSKEMEN. QazAqparat – Shyǵys Qazaqstan oblysynda apta sońyna deıin kóshkin júrý qaýpi saqtalady, dep habarlaıdy QazAqparat.
ShQO Tótenshe jaǵdaılar departamentiniń málimetine súıensek, aýa temperatýrasynyń kúrt jylynýyna baılanysty taýly jerlerde qar kóshkini júrýi múmkin.
«Aldyn alý jumystarynyń júrgizilip jatqanyna qaramastan 2-9 naýryz aralyǵynda kóshkin júrý qaýpi saqtalady. Sebebi bıyl jaýǵan qar mólsheri normadan kóp. Ótken aptanyń sońynda «Kazselezaşıta» mamandary «Óskemen-Taýly Úlbi-Severnoe» jolynyń eki ýchaskesinde jáne «Óskemen-Altaı» tasjolynyń úsh ýchaskesinde profılaktıkalyq kóshkin júrgizdi. Sonyń nátıjesinde 16700 tekshe metr qar túsken», - dep habarlady vedomstvo ókilderi.
TJD turǵyndarǵa alys saparǵa shyqpaýǵa, kóshkin qaýpi joǵary taýly jerlerge barmaýǵa keńes beredi.
