Shyǵys Qazaqstanda 167 gektarǵa jaıylǵan dala órtiniń beti qaıtpaı jatyr
ÓSKEMEN. QazAqparat – Shyǵys Qazaqstan oblysy Altaı aýdanynda 167 gektarǵa jaıylǵan dala órtiniń beti qaıtpaı jatyr, dep habarlaıdy QazAqparat tilshisi.
ShQO tótenshe jaǵdaılar departamenti baspasóz qyzmetiniń málimetine súıensek, Altaı aýdanynda ashyq alańda shóp pen buta órtenip jatyr.
Sol jerde qutqarýshylar, ormanshylar, jergilikti atqarýshy organ qyzmetkerleri jumys isteýde.
Jalpy sany 340-tan astam adam men 25 tehnıka tilsiz jaýmen kúreske tartylǵan. Sýaǵar qurylǵysy bar MI-8 tikushaǵy da iske qosyldy.
«Órt 2 qyrkúıek kúni túski ýaqytta shyqty. Jetýi qıyn taýly aımaqty sharpyǵandyqtan ony óshirý qıynǵa soǵýda. Aldyn ala derek boıynsha qyzyl jalynnyń aýmaǵy 167 gektardy quraıdy. Áýeden sholyp tekserý úshin «Qazavıaormanqorǵaý» mekemesiniń AN-2 ushaǵy jumyldyryldy. Eń jaqyn aýyl 25 shaqyrymdaı qashyqtyqta ornalasqan. Eldi mekenderge tónip turǵan qaýip joq», - deıdi departamenttiń baspasóz hatshysy Marına Lıskova.
Eske salsaq, osyǵan deıin Zaısan aýdanynda 45 gektarǵa jaıylǵan dala órti aýyzdyqtalǵanyn habarlaǵan edik.
