Shyǵys Qazaqstanda 163 nysan Ashyq jobasyna qatysýda
Elimizde 26 sáýirde iske qosylǵan Ashyq jobasy bıznes sýbektilerinde koronavırýs ınfektsııasynyń taralý qaýpin azaıtýǵa baǵyttalǵan.
Arnaıy jasalǵan qosymsha PTR-diń jalpy bazasymen biriktirilgen.
Bul ár azamattyń qaýipti dertke shaldyqqanyn nemese aýyrǵandarmen baılanysta bolǵanyn anyqtaýǵa múmkindik beredi.
«Búginde óńirde 163 mekeme Ashyq jobasyna qatysyp otyr. Jobaǵa kirgen kásipkerlik nysandardyń qatarynda saýnalar, fıtnes-ortalyqtar, SPA-ortalyqtar, basseınder, kompıýterlik klýbtar, boýlıngter, bılıardtar, kınoteatrlar, teatrlar, qoǵamdyq tamaqtaný oryndary, sondaı-aq oblysaralyq jáne qalalyq tasymaldaýdy júzege asyratyn kásiporyndar bar. Ashyq jobasynyń maqsaty – vırýs juqtyrǵan nemese baılanysta bolǵan adamdardyń qoǵamdyq oryndarǵa barý jaǵdaılaryn boldyrmaý. Sonymen qatar bıznes nysandaryn qala nemese aýdannyń «qyzyl» nemese «sary» aımaqta bolýyna qaramastan, halyqqa qaýipsiz qyzmet kórsetýin qamtamasyz etýge baǵyttalǵan» dep habarlady ShQO aqparat ortalyǵy.
Ashyq qosymshasy indettiń taralýynyń aldyn alýǵa múmkindik beredi.
Dese de, ol kásipkerlik sýbektilerin sanıtarlyq normalardy saqtaý jaýapkershiliginen bosatpaıdy.
