Shyǵys Qazaqstanda 16 mamyrdan bastap birqatar shekteýler alynady
ÓSKEMEN. QazAqparat – Shyǵys Qazaqstan oblysyndaǵy birqatar qala, aýdandarda karantın shekteýleri alynyp tastalmaq, dep habarlaıdy QazAqparat tilshisi.
Bul jaıly aımaq basshysy Danıal Ahmetov óziniń Instagram paraqshasynda jazdy.
«Sońǵy eki aı bárimizge ońaıǵa túspedi. Bul bılik organdarynyń batyl ári naqty is-áreketteriniń kezeńi boldy. Biz halyqqa barlyq talaptardy oryndaýda túsinistik, shydamdylyq jáne adal nıet tanytqany úshin alǵys aıtamyz. ShQO – koronavırýs juqtyrý kórsetkishi eń tómen óńirlerdiń biri. Osyǵan oraı 16 mamyrdan bastap qalypty ómirge kóshe bastaımyz. Turǵyndardyń dalaǵa tek ruqsattamamen shyǵýyna jáne kólik qozǵalysyna qatysty shekteýlerdiń barlyǵy alynady. Aýmaǵy 2000 sharshy metrge deıingi barlyq tolaıym jáne azyq-túlik satpaıtyn saýda oryndary óz jumysyn bastaıdy. Qonaqúıler tolyqqandy jumys tártibine kóship, Alakól demalys bazasyna aldyn ala joldama alýǵa ruqsat beriledi. Mamyr aıynyń 15-inen áýe reısteri men temirjol vokzaldarynda bılet satý bastalady. Jalpy aýmaǵynyń 30 paıyzy ǵana qamtylǵan jaǵdaıda dinı oryndarǵa barýǵa ruqsat etiledi», - deıdi ákim.
Onyń aıtýynsha, meıramhanalar, dámhanalar jáne basqa da tamaqtaný oryndary jumysyn bastaıdy. Ázirge tek jazǵy alańdar ashylady. Sonymen qatar onda jınalatyn adam sany bir ýaqytta 30-dan aspaýy kerek.
«Altaı, Kúrshim, Katonqaraǵaı, Zaısan, Kókpekti aýdandary men Rıdder qalasynda barlyq bilim ortalyqtary men balabaqshalar jumysyn qaıta jalǵastyrady. Bılıard bólmeleri, karaoke, klýbtar, boýlıng ortalyqtary, barlar da ashylady. Biraq Semeıden jáne basqa da aýdandardan karantın sharalaryn tolyqtaı alyp tastaýǵa áli erte. Osyǵan baılanysty ázirge oblys shekarasyndaǵy blokpostar alynbaıdy», - deıdi Danıal Ahmetov.
