Shyǵys Qazaqstanda 15 gektarǵa jaıylǵan dala órti aýyzdyqtaldy
ÓSKEMEN. QazAqparat – Shyǵys Qazaqstan oblysynda qutqarýshylar, ormanshylar men shekarashylar 15 gektar aýmaqqa jaıylǵan qyzyl jalyndy sóndirdi, dep habarlaıdy QazAqparat tilshisi.
ShQO tótenshe jaǵdaılar departamenti baspasóz qyzmetiniń málimetine súıensek, 13 mamyrda saǵat 14.40-ta Zaısan aýdanyndaǵy «Qaratal Qumy» ýchaskesinde shóp órtengen.
Oqıǵa ornyna órt sóndirý bólimsheleri men orman sharýashylyǵynyń qyzmetkerleri jedel jetti.
«Tilsiz jaýdyń jalpy aýmaǵy 15 gektardy quraǵan. Órtti sóndirýge barlyǵy TJD-nyń 15 qutqarýshysy men 3 tehnıkasy, orman sharýashylyǵynan 12 adam, 2 tehnıka jáne Zaısan shekara zastavasynan 70 sarbaz jumyldyryldy» dep habarlady vedomstvo ókilderi.
Osy rette departament mamandary óńir jurtshylyǵyna ystyq jáne jeldi aýa-raıynda ot jaǵýǵa tyıym salynǵandyǵyn eskertedi.
Eger órt shyǵyp jatsa, dereý «101» nemese «112» nómirine habarlasý qajet.
