Shyǵys Qazaqstanda 1400-den astam medıtsına qyzmetkeri koronavırýs juqtyrǵan
ÓSKEMEN. QazAqparat – Shyǵys Qazaqstan oblysynda koronavırýs pandemııasy bastalǵaly beri 1 423 medıtsına qyzmetkeri qaýipti dertke shaldyqqan, dep habarlaıdy QazAqparat tilshisi.
Bul jaıly ShQO óńirlik kommýnıkatsııalar qyzmetinde onlaın formatta ótken baspasóz máslıhatynda oblystyq Densaýlyq saqtaý basqarmasynyń ókili Asqar Horoshash málimdedi.
«Pandemııa bastalǵaly Shyǵys Qazaqstanda barlyǵy 1423 medıtsına qyzmetkeri qaýipti dert juqtyrdy. Onyń ishinde 8 adam qaıtys bolǵan. Bul jaǵdaılardyń 745-i óńirlik komıssııada qaralyp, sonyń sheshimi boıynsha 631 fakti bir jolǵy áleýmettik tólemdi júzege asyrý boıynsha QR DSM buıryǵynyń talaptaryna sáıkes keletin bolyp shyqty», - dedi ol.
Asqar Horoshashtyń aıtýynsha, birjolǵy áleýmettik tólemdi óńirlik komıssııa maquldaǵan barlyq medıtsına qyzmetkerleri, onyń ishinde kóz jumǵan 8 dárigerdiń otbasy aldy.
Esterińizge sala ketsek, Shyǵys Qazaqstan oblysy koronavırýstyń taralý qarqyny boıynsha «qyzyl aımaqqa» engen. Óńirde shekteý sharalary 25 qarashaǵa deıin uzartyldy.
15 qarashada ShQO-daǵy Altaı qalasy da karantınge jabylǵan.
