Shyǵys Qazaqstanda 13,5 myńǵa jýyq adam onkologııalyq esepte tur
ShQO densaýlyq saqtaý basqarmasy baspasóz qyzmetiniń málimetine súıensek, jyl saıyn elimizde onkologııalyq syrqat 30 myńǵa jýyq adamnan anyqtalady. Búginde dıspanserlik esepte 200 myń qazaqstandyq tur, onyń ishinde Shyǵys Qazaqstannyń 13 444 turǵyny bar.
Ótken jyly skrınıngtik tekserýlermen oblystyń 140 myńnan astam turǵyny qamtyldy. Skrınıngtik baǵdarlamalar men erte dıagnostıkanyń mańyzdylyǵy týraly ShQO kópsalaly onkologııa jáne hırýrgııa ortalyǵy dırektorynyń emdeý jumysy jónindegi orynbasary Roman Nálibaev aıtyp berdi.
«Qazir qaterli isik úkim emes. Eń mańyzdysy - dertti asqyndyryp, ýaqytty jiberip almaý. Nátıje aýrý erte satysynda anyqtalǵanda ǵana jaqsy bolady. Onkologııalyq aýrý kúdigimen kelgen naýqas kómek alý úshin eń aldymen, tirkelgen jeri boıynsha óz emhanasyna barýy kerek. Ondaǵy dáriger 3-5 kún aralyǵynda naýqasty qabyldaýǵa jáne oǵan barlyq qajetti zertteýlerden tegin ótýge joldama berýge mindetti, atap aıtqanda ýltradybystyq zertteý, qan analızi, isik markerleri, KT, MRT jasaý. Qajet bolǵan jaǵdaıda patsıentten bıopsııa alýy kerek. Eger ol muny isteı almasa, ony onkologııalyq ortalyqqa jiberýi tıis», - deıdi ol.
Onyń aıtýynsha, naýqasqa 10 kún ishinde naqty dıagnoz qoıylýy qajet. Osy rette, Óskemen qalasynyń turǵyny óz oqıǵasymen bólisti. 45 jastaǵy áıel adam eshteńeden kúdiktenbegen, sebebi aýrý belgileri esh bilinbegen. Skrınıngtiń arqasynda áıelde isik erte satysynda anyqtaldy.
«Skrınıng ómirimdi saqtap qaldy. Skrınıngtik tekserý aıasynda mende qaterli isik birinshi satysynda anyqtaldy. Árıne, áýeli qatty qorqyp kettim. Biraq onkologııalyq ortalyqtyń dárigerleri óz jumystaryna óte uqypty qaraıdy eken. Olar maǵan barlyq kómekti kórsetip, emdelýime bar jaǵdaıdy jasady», - deıdi qala turǵyny.
