Shyǵys Qazaqstanda 12 jasar jetkinshek joǵalyp ketti
ÓSKEMEN. QazAqparat – Shyǵys Qazaqstan oblysy Glýbokoe aýdanynda iz-tússiz joǵalyp ketken jetkinshek izdestirilip jatyr, dep habarlaıdy QazAqparat tilshisi.
ShQO polıtsııa departamenti baspasóz qyzmetiniń málimetine súıensek, 24 maýsym kúni keshki ýaqytta Glýbokoe aýdanynyń turǵyny «102» jedel arnasyna qońyraý shalǵan.
Er adam óz sózinde 2008 jylǵy qyzy Knelts Marına Romanovnanyń joǵalyp ketkenin jetkizdi.
«Belgili bolǵandaı, 18 maýsymda jetkinshek Cheremshanka aýylyndaǵy úıden syrtqa shyǵyp ketip, sol kúıi qaıtyp oralmaǵan. Qazirgi ýaqytta polıtsııa qyzmetkerleri jedel-izdestirý sharalaryn júrgizýde. Alaıda qyz ázirge tabylmady», - dep habarlady vedomstvo ókilderi.
Sondaı-aq izdestirý jumystaryna volonterler de jumyldyrylǵan.
Osy rette, tártip saqshylary Marına Kneltstiń qaıda ekenin bilgender bolsa «102» arnasyna habarlasýdy suraıdy.
