Shyǵys Qazaqstan joldarynyń 89%-y qanaǵattanarlyq jaǵdaıda
ÓSKEMEN. QazAqparat – Shyǵys Qazaqstan oblysyndaǵy kólik joldarynyń 89%-y qanaǵattanarlyq jaǵdaıda, dep habarlaıdy QazAqparat tilshisi.
Óńirde jol jóndeý jumystary oıdaǵydaı júrgizilýde. Bul jaıly baspasóz máslıhaty barysynda ShQO Jolaýshylar kóligi jáne avtomobıl joldary basqarmasy basshysynyń mindetin atqarýshy Nurbek Turarov málim etti.
«Oblystyq jáne aýdandyq mańyzy bar joldardy ortasha jóndeý jumystary jalpy uzyndyǵy 200 shaqyrymdy quraıtyn 15 ýchaskede júrgizilgen. Ásirese, avtokólik qozǵalysy neǵurlym joǵary shekara mańyndaǵy aýdandarǵa basymdyq berildi. Atap aıtqanda, «Maqanshy-Jalańashkól», «Aıagóz-Qaraýyl-Semeı-Qaınar», «Omby-Maıqapshaǵaı-Shilikti-Aqjar», «Kúrshim-Qaljyr», «Tavrııa-Kamenka-Troınıtskoe», «Kúrshim-Aqsýat-Jolnusqaý», «Sogornoe-Barlyq-Aqsý», «Semeı-Kýrchatov» tasjoldary men birneshe aýyldyń kireberisi ortasha jóndeýden ótti», - dedi ol.
Sondaı-aq bıyl «Úlken Naryn-Kúrshim» tasjolyna asfalt tóseý jumystary óz máresine jetken. Nurbek Turarovtyń aıtýynsha, osy jyly joldardy kútip-ustaýǵa 4,3 mlrd teńge bólindi.
Jalpy, óńir boıynsha aýdandyq jáne oblystyq mańyzy bar joldardyń 89%-y qanaǵattanarlyq jaǵdaıda.
