Shyǵys Qazaqstan turǵyndary babalardyń mádenı murasymen tanysady

ÓSKEMEN. QazAqparat - Shyǵys Qazaqstan oblysynda «Ertis-kontsert» ujymy Tarbaǵataı aýdanynyń Aqjar, Tuǵyl, Aqsýat, Jetiaral, Kókjyra aýyldaryna gastrol uıymdastyrdy, dep habarlaıdy QazAqparat tilshisi.

Aqsýat aýylynyń ózinde kontsertke 10 myńnan astam kórermen jınaldy. «Ertis-kontsert» shyǵarmashylyq ujymynyń gastrol sapary aıasynda «Shyǵysym shyraıly elim» kontserttik baǵdarlamasy da usynyldy.

Budan tys, aýdanǵa oblystyq tarıhı-ólketaný mýzeıiniń jyljymaly kórmesi de ákelindi.

Osy aptada Óskemendegi oblystyq tarıhı-ólketaný mýzeıinde «Rýhanı jańǵyrý» ulttyq baǵdarlamasyn júzege asyrý aıasynda «Shyǵys Qazaqstan. Kıeli mekenderge saıahat» atty úlken kórme ashyldy. Oǵan Shyǵys Qazaqstandaǵy kıeli jerler týraly syr shertetin biregeı artefaktiler qoıyldy.

Óńirdegi kıeli oryndardyń jyljymaly kórmesi oblys boılap jasalatyn saıahat úshin arnaıy ázirlengen. Ol óńirdiń árbir turǵyny óz tarıhyn bilýi, týǵan jerdiń qasıetin boıyna tereń sińirýi úshin uıymdastyryldy.