Shyǵys Qazaqstan oblysynyń Kúrshim aýdanynda taýly jerde shóp órtenip jatyr

ÓSKEMEN. QazAqparat – Shyǵys Qazaqstan oblysynda taýly jerde shóp órtenýde, dep habarlaıdy QazAqparat tilshisi.

ShQO Tótenshe jaǵdaılar departamenti baspasóz qyzmetiniń málimetine súıensek, Kúrshim aýdanyndaǵy taýly jerde shóp órtendi.

- Kúrshim aýdany Quıǵan aýyldyq okrýginiń aýmaǵynda shyqqan dala órtiniń jalpy aýdany shamamen 6 gektarǵa jetedi. Taýly jer men qatty jeldiń saldarynan qyzyl jalyn birden jan-jaqqa tarap ketti. Tehnıka jetýi qıyn jer bolǵandyqtan órt sóndirýshilerge jaıaý jumys isteýge týra kelýde, - delingen aqparatta.

Tilsiz jaýdy sóndirýge Úlken Naryn jáne Kúrshim orman sharýashylyqtarynan, TJD órt sóndirý qyzmetinen 23 adam men 5 tehnıka jumyldyryldy.

Qazirgi ýaqytta «Qazgıdromet» aqparaty boıynsha órt ornyndaǵy jel ekpini sekýndyna 3 metrge jetedi.