Shyǵys Qazaqstan oblysyndaǵy sý tasqyny zardaptaryn joıýǵa 10,3 mlrd. teńge qajet bolady
ASTANA. Sáýirdiń 9-y. QazAqparat /Qanat Mámetqazyuly/ - Shyǵys Qazaqstan oblysynda oryn alǵan sý tasqyny zardaptaryn joıýǵa 10,3 mlrd. teńge qajet bolady. Búgin QR Parlamenti Senatynyń jalpy otyrysynda Úkimet basshysynyń atyna saýal joldaǵan senator Sergeı Plotnıkov osylaı málim etti,
dep habarlaıdy QazAqparat.
«Sý tasqynynyń alǵashqy soqqysynan óńirdi qalpyna keltirý jáne zardaptaryn joıýǵa aldyn ala baǵalaýlar boıynsha 10,3 mıllıard teńge qajet. Bul rette qıraǵan úılerdiń ornyna salynatyn 536 turǵyn úıdiń qurylysy úshin 3 mıllıardqa jýyq teńge kerek. 621 úıdiń aǵymdaǵy jáne zilzilaǵa qarsy kúsheıtilgen kúrdeli jóndeýlerine 584 mıllıon teńge qajettigi aıqyndaldy. Oblystyń Kókjyra, Jantekeı, Jıdeli aýyldarynda qurylysyna 1,7 mıllıard teńge jumsalatyn 140, 180 jáne 600 oryndyq mektepter salynýy tıis. Sondaı-aq, tórt densaýlyq saqtaý nysanynyń qurylysyna shamamen 600 mıllıon teńge ketetin 4 aýyldyq dárigerlik emhana salynýy shart», dedi S. Plotnıkov. Onyń aıtýynsha, budan bólek oblystyń avtokólik joldarynyń qyzmeti úshin arnaıy tehnıkalar satyp alý qajet bolsa, óńirlerdegi sý qoımalaryn qaıta jóndeýge de birshama qarajat qajet etiledi.
«Osy aıtylǵandardy eskere otyryp, Úkimettiń rezervinen qarajat bólinýin suraımyn. Bundaı sharalar eldi-mekenderge turǵyndardyń qaıta oralýyna jaǵdaı jasaıdy, áleýmettik shıelenisti jeńildetip, aldaǵy tótenshe jaǵdaılardy joıý shyǵyndaryn qysqartatyn bolady», dedi senator. Esterińizge sala keteıik, sý tasqynan zardap shekken Shyǵys Qazaqstan oblysynyń turǵyndarymen kezdesip, jaǵdaıdy óz kózimen kórý úshin Senat depýtattary Talǵatbek Abaıdildın men Sergeı Plotnıkov osy ólkege baryp kelgen bolatyn.
