Shyǵys Qazaqstan oblysyndaǵy órtke qatysty sotqa deıingi tergeý bastaldy
«10 mamyr kúni Shyǵys Qazaqstan oblysynyń Rıdder qalasynda iri órt boldy. Іshki ister mınıstri Erlan Turǵymbaevtyń nusqaýymen ShQO tártip saqshylary táýlik boıy kezekshilik uıymdastyryp, halyqqa kómek kórsetti. Alǵashqy mınýttan bastap polıtseıler qutqarýshylarǵa órtti sóndirý jáne órt aımaǵynan adamdardy evakýatsııalaýǵa járdemdesip jatyr. Rıdder qalalyq polıtsııa bóliminiń barlyq jeke quramy qyzmet atqarýdyń kúsheıtilgen nusqasyna aýystyryldy jáne tıisti qoǵamdyq tártipti qamtamasyz etý maqsatynda polıtsııa jasaqtarynyń tyǵyzdyǵy kúsheıtildi», - dedi QR ІІM resmı ókili Nurdildá Oraz mınıstrliktiń aptalyq brıfıngisinde.
Onyń aıtýynsha, túni boıy shaǵynaýdanda patrýldik qyzmet ekıpajdary qoıylyp, qorshaý uıymdastyrylǵan jáne múlik urlaý men tonaýdyń aldyn alý úshin bos turǵan úılerde kezekshilik jasalǵan.
Qutqarý jumystaryna 300-den astam polıtsııa qyzmetkeri men 40-qa jýyq arnaıy tehnıka jumyldyrylǵan. Glýbokoe jáne Shemonaıha aýdandarynyń polıtsııa bólimderi, ShQO polıtsııa departamentiniń jedel den qoıý arnaıy bólimshesi qyzmetkerleri órt ornynda kómektesip jatyr.
«Sonymen birge, órt faktisi boıynsha QR Qylmystyq kodeksiniń 204-baby 2-bóligi boıynsha sotqa deıingi tergeý bastaldy. Qazirgi ýaqytta oqıǵanyń jaı-japsary anyqtalyp jatyr», - dedi Nurdildá Oraz.
Esterińizge sala ketsek, 10 mamyr kúni ShQO-daǵy Rıdder orman sharýashylyǵynda órt shyqty. Dala órti 310 gektar aýmaqty sharpyp, 1 adam qaza tapty. Órtke baılanysty shuǵyl jeli iske qosyldy.
Memleket basshysy Úkimet pen Shyǵys Qazaqstan oblysynyń ákimdigi órtten zardap shekken Leshoz kentiniń turǵyndaryna kómek kórsetip, baspanamen qamtamasyz etýdi tapsyrdy.
Tótenshe jaǵdaılar mınıstrliginiń resmı ókili Talǵat Ýálı BAQ ókilderine Rıdder qalasynyń Leshoz kentindegi orman órtiniń alǵashqy yqtımal sebepterin atady.