Shyǵys Qazaqstan oblysyndaǵy gıdrotehnıkalyq nysandardyń jartysynan kóbi jóndeýdi qajet etedi - Bas prokýratýra
ASTANA. Sáýirdiń 8-i. QazAqparat /Aıdar Ospanalıev/ - Shyǵys Qazaqstan oblysyndaǵy gıdrotehnıkalyq nysandardyń jartysynan kóbin jóndeý kerek.
Búgin jýrnalıstermen bolǵan aptalyq brıfıngte Bas prokýratýranyń resmı ókili Nurdáýlet Súıindikov osylaı dedi, dep habarlaıdy QazAqparat.
Onyń sózine qaraǵanda, Memleket basshysynyń arnaıy tapsyrmasyna sáıkes, prokýratýra organdary elimizdiń sý qoımalaryndaǵy qaýipsizdik sharalary boıynsha tıisti tekserý júrgizgen. «Qyzylaǵashtaǵy plotınanyń jarylýyna ony paıdalaný barysyndaǵy zańsyzdyqtardyń sebep bolǵandyǵyn eskere kele tekserýler barysynda sý qoımalarynyń ıeleriniń qaýipsizdik sharalaryn oryndaý barysyna basa nazar aýdaryldy. Osyǵan qaraı tekserýler kezinde kóptegen zań buzý áreketteri anyqtaldy. Mysaly, sý qoımalaryna júrgizilýi tıis jóndeý jumystary ýaqytynda júzege asyrylmaǵan. Sonymen qatar qoımalardyń janynda zańǵa qaıshy sý sharýashylyǵymen baılanysty nysandar qoıylǵan. Buǵan qosa onda sýdyń deńgeıin baqylaý sharalary talapqa saı júzege asyrylmaıdy nemese sýdyń mólsherin ólsheıtin arnaıy qurylǵylar qoıylmaǵan», dedi resmı ókil.
Ol keltirgen málimetterge qaraǵanda, Almaty oblysynda sharýa qojalyqtarynyń biriniń ıesi Baımaǵambetov «Jarmuhambet» sý kózinde aýyl sharýashylyǵyna paıdalaný úshin qoldan arnaıy beton qurylǵy ornatqan. Osyǵan oraı atalmysh áreket boıynsha ákimshilik quqyq buzýmen baılanysty is qozǵaldy. «Sondaı-aq «Aqeshki» sý qoımasynda arnaıy sý beketteri qoıylmaǵan jáne sýdy ólsheıtin quraldar da joq. Bundaı zań buzý áreketteri elimizdiń kóptegen aımaqtaryna tán», dedi N.Súıindikov.
