Shyǵys Qazaqstan oblysynda joǵalyp ketken 16 jasar bozbala tabyldy
ÓSKEMEN. QazAqparat – Shyǵys Qazaqstan oblysy Glýbokoe aýdanynyń polıtsııa qyzmetkerleri joǵalyp ketken bozbalany tapty, dep habarlaıdy QazAqparat tilshisi.
ShQO polıtsııa departamenti baspasóz qyzmetiniń málimetine súıensek, 26 mamyrda túngi saǵat 2:30-da «102» jedel arnasyna habarlasqan 38 jastaǵy áıel kámelet jasyna tolmaǵan ulynyń joǵalyp ketkenin aıtqan.
Óz sózinde ol balasynyń saǵat 19.00 shamasynda úıden shyǵyp ketip sol kúıi qaıta oralmaǵanyn jetkizdi.
«Tártip saqshylary jedel 16 jastaǵy bozbalany izdeýge kiristi. Birneshe saǵat boıy polıtseıler jasóspirimniń týystary men dostarynyń úılerine baryp, kóshelerdi aralady. Jaqyn mańdaǵy eldi mekenderdi jáne Ertis ózeniniń jaǵalaýyn jiti tekserdi. Nátıjesinde, 2 saǵattan keıin bozbala tabyldy. Ol dosynyń úıinde bolǵan» delingen habarlamada.
Jasóspirimniń densaýlyǵyna eshqandaı zaqym kelmegen. Qazirgi ýaqytta ol ata-anasyna tapsyryldy.
