Shyǵys Qazaqstan oblysynda úzdik muǵalimder marapattaldy
ÓSKEMEN. QazAqparat – Shyǵys Qazaqstan oblysynda kásibı mereke qarsańynda úzdik muǵalimder marapattaldy, dep habarlaıdy QazAqparat tilshisi.
Óńirde jyl kóleminde erekshe kózge túsken ustazdardy marapattaý sharasy onlaın formatta ótkizildi. Jyl saıynǵy «Úzdik pedagog» baıqaýyna bıyl 5 myńnan astam muǵalim qatysqan. Onyń ishinde 500 adam baıqaýdyń aýdandyq kezeńinen súrinbeı ótti. Al oblystyq deńgeıge 20 muǵalim iriktelse, 6 adam respýblıkalyq baıqaýǵa Shyǵys Qazaqstan oblysy atynan qatysty.
«Úzdik pedagog-2020» respýblıkalyq baı̆qaýynda jeńiske jetken óńirdiń 4 ustazyna 2,7 mıllıon teńgeniń sertıfıkattary berilgen.
Aımaq basshysy Danıal Ahmetov muǵalimderdi kásibı merekelerimen quttyqtady.
«Muǵalimdikti álemdegi kez-kelgen mamandyqpen salystyrýǵa bolmaıdy. Balaǵa bilim áleminiń esigin ashyp, ony eresek ómirge daıyndaý arqyly sizder el bolashaǵynyń baıraǵyn berik qalap jatyrsyzdar. Pandemııa pedagog jumysynyń qanshalyqty mańyzdy jáne qundy ekendigin aıqyn kórsetti», - dedi ol.
Oblys ákimi onlaın sharada «Úzdik pedagog-2020» baıqaýynyń óńirlik kezeńinde top jarǵan 2 muǵalimge 800 myń teńgeniń sertıfıkattaryn tabystady.
Jyl saıyn aımaq oqýshylary halyqaralyq olımpıadalarda joǵary nátıjeler kórsetip keledi. Danıal Ahmetov osy jyly halyqaralyq olımpıadalardyń jeńimpazdary men júldegerlerin daıyndaǵan 6 muǵalimniń joǵary kásibıligin atap ótip, olarǵa 500 myń teńge kólemindegi aqshalaı sertıfıkattar men Alǵys hattar tabys etti. Bastaýysh synyptyń 3 muǵalimi 300 myń teńgeniń sertıfıkattaryn ıelendi. Sonymen qatar óskeleń urpaqty bilim nárimen sýsyndatýda eren eńbek sińirgen ustazdar ShQO ákimi Danıal Ahmetovtiń Qurmet gramotalarymen marapattaldy.
