Shyǵys Qazaqstan oblysynda úıinen qashyp ketken 16 jasar qyz tabyldy
ÓSKEMEN. QazAqparat – Shyǵys Qazaqstan oblysynda úıden qashyp ketken boıjetken ata-anasyna qaıtaryldy, dep habarlaıdy QazAqparat tilshisi.
ShQO polıtsııa departamenti baspasóz qyzmetiniń málimetine súıensek, 10 aqpanda saǵat 11:00-de Altaı qalasynyń 35 jastaǵy turǵyny polıtsııaǵa habarlasty.
Onyń aıtýynsha, 16 jastaǵy qyzy úıden tańerteń saǵat 9-dar shamasynda ketip, sol kúıi oralmaǵan.
Anasy kámelet jasyna tolmaǵan qyzynyń qaıda jáne ne úshin ketip qalǵanynan beıhabar.
Altaı aýdandyq polıtsııa bóliminiń jeke quramy dereý boıjetkendi izdeýge kirisken.
Jedel izdestirý sharalary barysynda qolaısyz otbasylar, prıtondar, pedofılder, nashaqorlar, maskúnemder men buryn sottalǵan adamdar tekserildi.
«Polıtsııa qyzmetkerleri turǵyn úılerdiń shatyrlaryn, jertólelerin jáne qaraýsyz qalǵan ǵımarattardy da qarap shyqty. Nátıjesinde bir saǵattyń ishinde qyz aman-esen tabylyp, úıine jetkizildi», - deıdi ShQO PB bastyǵy Saǵat Mádıev.
Onyń ne sebepti úıden ketkeni anyqtalýda. Óz kezeginde anasy polıtsııa qyzmetkerlerine óz rızashylyǵyn bildirdi.
