Shyǵys Qazaqstan oblysynda maral atqan brakoner ustaldy

ÓSKEMEN. QazAqparat – Shyǵys Qazaqstan oblysy Kókpekti aýdanynda maral atqan brakoner ustaldy, dep habarlaıdy QazAqparat tilshisi.

Polıtsııa qyzmetkerleri, «Ohotzooprom» RMQK ókilderi, ShQO Orman sharýashylyǵy jáne janýarlar dúnıesi aýmaqtyq ınspektsııasy mamandary birlesken reıd júrgizdi.

Shara barysynda Kókpekti aýyldyq okrýgindegi Tolaǵaı taýynyń mańynda kele jatqan avtokólik toqtatylǵan.

Tekserý barysynda aýyl turǵyny tizgindegen kólik salonynda maral eti tabyldy.

«9 qap et, «Vepr 308» markaly karabın atys qarýy, 10 oq, maraldyń 2 múıizi, pyshaq jáne balta tárkilendi. Er adamnyń jabaıy ańdy atýǵa ruqsat qaǵazdary bolmaǵan», - dep habarlady ShQO orman sharýashylyǵy jáne janýarlar dúnıesi aýmaqtyq ınspektsııasynyń baspasóz qyzmeti.

Qazirgi ýaqytta atalǵan fakti boıynsha QR QK 337-baby 1-bóligine (zańsyz ań aýlaý) sáıkes sotqa deıingi tergeý amaldary bastaldy.