Shyǵys Qazaqstan oblysynda mamyrdan bastap barlyq saıabaqtar ashylady
ÓSKEMEN. QazAqparat – Shyǵys Qazaqstan oblysynda kelesi aıdan bastap barlyq saıabaqtar ashylady, dep habarlaıdy QazAqparat tilshisi.
Bul jaıly aımaq basshysy Danıal Ahmetov Facebook-tegi paraqshasynda jazdy.
«1 mamyrdan bastap óńirdegi barlyq saıabaqtar ashylady. 29 sáýirde Óskemendegi demalys oryndarynyń daıyndyǵyn tekserip, volonterlermen birge Jambyl saıabaǵynda aǵashtar otyrǵyzdyq. Kelesi aıda ata-analarǵa balalarymen birge serýenge shyǵyp, saıabaqtarda qydyryp, taza aýada dene shynyqtyryp, alańqaılarda oınaýǵa ruqsat etiledi. Alaıda ázirge bunyń bári tek berilgen ruqsat qaǵazdary jáne áleýmettik qashyqtyqty saqtaý arqyly ǵana múmkin bolmaq», - deıdi ákim.
Onyń aıtýynsha, 4 mamyrdan bastap karantın sharalary kezeń-kezeńimen jeńildetiledi. Osylaısha, birqatar kásipkerlik nysandarǵa sanıtarlyq-epıdemıologııalyq jáne dezınfektsııalyq sharalardy qatań saqtaı otyryp óz jumysyn qaıta bastaýyna ruqsat berilmek.
«Sonymen qatar 4 mamyrdan eki baǵyt boıynsha – Nur-Sultan men Almatyǵa áýe qozǵalysyn ashýdy josparlap otyrmyz. Ýaıymdaýdyń qajeti joq, ushý barysynda barlyq jolaýshylar PTR ádisimen testileýden ótkiziledi. Budan bólek, meniń tapsyrmam boıynsha bizdiń qalalarǵa keletin barlyq adamdar mindetti túrde qosymsha ekspress testileýden ótedi», - deıdi Danıal Ahmetov.
