Shyǵys Qazaqstan oblysynda kóktemde jaǵdaıdyń qıyn bolýy yqtımal - Úkimettegi otyrys
ASTANA. Naýryzdyń 9-y. QazAqparat /Rýslan Ǵabbasov/ - Shyǵys Qazaqstan oblysynda kóktemde jaǵdaıdyń qıyn bolýy múmkin. Bul týraly búgin Astanada ótken Úkimet otyrysynda Kólik jáne kommýnıkatsııa mınıstri Ábilǵazy Qusaıynov málim etti,
dep habarlaıdy QazAqparat.
Qys boıy óńirdegi joldardyń basym bóligi qar qursaýynda qalǵanyn eske salyp ótken mınıstr, «menińshe, joldyń bir bóligin sý basatyn sekildi. Olardyń jaǵdaıy onsyz da kúrdeli. Kóktemgi sý tasqynynan keıin bul joldarda kúrdeli jóndeý jumystaryn júrgizý qajet bolady», dedi.
Óz kezeginde Tótenshe jaǵdaılar mınıstri Vladımır Bojko ShQO-da qardyń qalyńdyǵy 60-tan 200 santımetrge deıin jetetinin, sondaı-aq óńirdiń basym aýmaǵynda qardyń deńgeıi ortasha jyldyq normadan 2-3 ese asyp túskenin jetkizdi.
«Bıylǵy jylǵy qańtar men aqpanda Óskemende qardyń kólemi eleýli deńgeıde jınaldy. 200 myń tekshe metri syrtqa shyǵarylsa da, bul tek 3-4 ortalyq kóshelerdiki. Biz qalanyń aýdandary boıynsha júrip óttik, jaǵdaı óte kúrdeli», dedi Tótenshe jaǵdaılar mınıstri.
V. Bojko qatty aıazdardyń saldarynan oblystaǵy ózenderdegi muzdyń qalyńdyǵy 70-ten 160 santımetrge deıin jetkenin, bul óz kezeginde muz kóshkini kezinde ózenniń tasýyna ákelip tireıtinin aıtyp ótti.
Qalyptasqan jaǵdaı boıynsha bıylǵy jylǵy qar erıtin kezeńde oblystyń 30-ǵa tarta aýyldary sý basatyn aýmaqta bolýy múmkin.
«Ásirese, qıyn jaǵdaı Zyrıan aýdanynyń Nıjnebykovskoe aýylynda qalyptasyp otyr. Onda muz kóshkini bastalǵanda jáne qar erigen kezde turǵyn úılermen birge ózen jaǵasynyń aýmaǵy qulaýy múmkin», dedi vedomstvo basshysy.
Osyǵan baılanysty mınıstr atalǵan óńirge kómek kórsetý qajettiligi týyndaıtynyn jetkizdi. Óz kezeginde Úkimet basshysy Kárim Másimov V. Bojkoǵa oblys ákimdigimen birlese otyryp óńirge kómek kórsetý boıynsha Úkimetke jedel túrde usynys engizýdi tapsyrdy.
