Shyǵys Qazaqstan oblysynda karantın 1 shildege deıin uzartyldy
Qujatqa sáıkes, Shyǵys Qazaqstan oblysynyń barlyq aýmaǵynda 2020 jylǵy 1 shilde saǵat 00.00-ge deıin shekteýler, sonyń ishinde karantın sharalary saqtalady. Sharýashylyq jáne ózge de qyzmet túrlerine qatysty aıryqsha jaǵdaı engiziledi.
Sońǵy 7 kún ishinde ósim 4,7% quraǵan Semeıge erekshe kóńil bólindi. Qaýlyda qalada azyq-túlik satpaıtyn saýda nysandarynyń jumys ýaqytyn saǵat 10.00-den 17.00-ge deıin jáne azyq-túlik satatyn saýda obektileriniń jumys ýaqytyn saǵat 08.00-den 20.00-ge deıin qysqartý qajettigi týraly aıtylǵan.
Bul rette shekteýler azyq-túlik emes taýarlardy kóterme-bólshek jáne bólshek saýdamen satatyn saýda nysandaryna, iri saýda obektileri men keshenderine, saýda-oıyn-saýyq ortalyqtaryna, aýmaǵy 2000 sharshy metrden asatyn saýda úılerine tyıym salynady. Sondaı-aq, túngi klýbtardyń (dıskotekalardyń), barlardyń, kalıandar men karaoke jumysyna ruqsat etilmeıdi.
Sonymen qatar, qujatta Semeı qalasynda, dálirek aıtqanda, aýrý juqtyrý deńgeıi joǵary qala aýdandarynda, sondaı-aq adamdar kóp jınalatyn jerlerde, turǵyn úı sektorynda, saıajaı aýmaǵynda, saıabaqtarda, gúlzarlarda, aýla ishindegi balalar oınaıtyn alańdar men sport alańdarynda, rekreatsııa aımaqtarynda, qoǵamdyq kólikterde maskalyq rejım men áleýmettik qashyqtyqty saqtaý turǵysynan patrýldeý kúsheıtiletini habarlandy.
Oblystyń bas sanıtar dárigeriniń qaýlysynda Úrjar aýdanynda, atap aıtqanda Alakól kóliniń jaǵalaýynda da sanıtarlyq normalardy saqtaý kerektigi aıtylady.