Shyǵys Qazaqstan oblysynda issaparda júrgen jigit sýǵa ketti
ÓSKEMEN. QazAqaparat - Shyǵys Qazaqstan oblysynyń Jarma aýdanyna issaparmen kelgen óskemendik sýǵa batyp ketti, dep habarlaıdy QazAqparat tilshisi.
Óskemenniń 33 jastaǵy turǵyny Jarma aýdanynyń Áýezov kentinde issaparda júrgen. 8 maýsym kúni ol túski as kezinde birneshe adammen birge kentten jarty shaqyrymda jatqan jasandy toǵanǵa shomylýǵa barady. Qaıǵyly oqıǵa osy kezde oryn alǵan.
«Oqıǵanyń mán-jaıyn quzyrly organdar anyqtaýda. Shomylýǵa barǵan adamdardyń barlyǵy ishimdik ishkeni anyq. Jasandy toǵan shomylýǵa arnalmaǵan» - delingen oblystyq Tótenshe jaǵdaılar departamenttiń aqparatynda.
Súńgýirler oqıǵa ornyna kelesi kúni jetip, 1,5 saǵattyń ishinde múrdeni tapqan.
Shomylý maýsymy bastalǵaly beri Shyǵys Qazaqstanda osymen besinshi adam sýdan ajal tapty. Onyń bireýi - bala.
